Sweet Nicotine Breaks- Oh, heto ang handog ko sa Pebrero!

Nagiging Grade 3 ako na nakapila sa flag ceremony kapag kasama kita.
Yung iba ang kulay ng sikat ng umaga,
iba ang amoy ng bagong floorwaxed na Room III-Narra,
iba ang init sa hapon kasi may langit-lupa.

Nagiging Grade 3 ako kapag kasama kita.
Naaalala ko kasi kung gaano kasaya yung kantang "uwian na!" kapag,
oo nga naman,
uwian na.

Nagiging Grade 3 ako kapag kasama kita
Yung maski mga hantik sa may gumamela hindi nakakawala
o yung burol ng buhangin sa may construction site
Pang-substitute mo na sa clay doh kasi pangmayaman.

Nagiging Grade 3 ako kapag kasama kita
kasi nagiging tunay ang mga tawa ko,
puro ang mga ngiti ko,
back to basics ang mundo,
sakto lang ang tatlong piso.

Nagiging Grade 3 ako kapag kasama kita
Kasi naaalala ko ang mga pakiramdam na nilimot na ng mga taon.
Bumabalik ang mga alaalang nawalay sa bawat panahon.

Nagiging Grade 3 ako.
Kasi kapag kasama kita, bumabalik sa 1995 ang mundo.
Kasi kapag kasama kita, nawawala lahat ng inhibitions ko.
Ganito lang naman kasimple to eh.
Ganito ang ginagawa ng pagibig mo.